កាលពីថ្ងៃសុក្រ តុលាការបានបដិសេធសំណើរបស់លោក Netanyahu ក្នុងការលើកពេលសវនាការរយៈពេលពីរសប្តាហ៍។ ប៉ុន្តែ នៅចុងសប្តាហ៍ លោកប្រធានាធិបតីអាមេរិក ដូណាល់ ត្រាំ បានធ្វើអន្តរាគមន៍តាមរយៈការបង្ហោះសារនៅលើបណ្តាញ Truth Social ដោយហៅសវនាការនេះថាជា «ភាពមិនសមហេតុផល» និងបានលើកឡើងថា វាអាចរំខានដល់សមត្ថភាពរបស់លោក Netanyahu ក្នុងការចូលរួមចរចាជាមួយក្រុមហាម៉ាស់ និងអ៊ីរ៉ង់។ លោកថែមទាំងបានព្រមានថា ក្រុងវ៉ាស៊ីនតោននឹងមិន «ឈរមើលរឿងនេះទេ»។ តុលាការស្រុកហ្សេរុយសាឡឹម បានសម្រេចលុបចោលសវនាការនៅក្នុងសវនាការកាត់ក្តីអំពើពុករលួយ របស់នាយករដ្ឋមន្ត្រីលោក Benjamin Netanyahu សម្រាប់សប្តាហ៍នេះ ដោយបានផ្លាស់ប្តូរការសម្រេចចិត្តពីមុនរបស់ខ្លួន ក្រោយពីបានទទួលយកសំណើដែលមេដឹកនាំអ៊ីស្រាអែលរូបនេះបានដាក់ស្នើ ដោយលើកឡើងពីហេតុផលការទូត និងសន្តិសុខ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី៣០ ខែមិថុនា ឆ្នាំ២០២៥។ សេចក្តីសម្រេចថ្មីរបស់តុលាការដែលត្រូវបានផ្សព្វផ្សាយ បានបញ្ជាក់ថា «ហេតុផលថ្មី» ដែលត្រូវបានផ្តល់ដោយលោក Netanyahu ប្រធានទីភ្នាក់ងារចារកម្ម Mossad និងប្រធានចារកម្មយោធា បានបង្ហាញពីភាពត្រឹមត្រូវនៃការលុបចោលសវនាការនេះ។ ទោះជាយ៉ាងណា គេមិនទាន់ច្បាស់ទេថា តើការបង្ហោះរបស់លោក ត្រាំ មានឥទ្ធិពលលើការសម្រេចចិត្តរបស់តុលាការដែរឬទេ។ លោក Netanyahu ដែលត្រូវឡើងផ្តល់សក្ខីកម្មនៅថ្ងៃចន្ទ បានបង្ហោះសាររបស់លោក ត្រាំ ឡើងវិញនៅលើបណ្តាញ X ហើយបានបន្ថែមថា «សូមអរគុណម្តងទៀតប្រធានាធិបតី ដូណាល់ ត្រាំ។ រួមគ្នា យើងនឹងធ្វើឲ្យមជ្ឈិមបូព៌ាអស្ចារ្យម្តងទៀត!»។ គួរបញ្ជាក់ថា លោក Netanyahu ត្រូវបានចោទប្រកាន់តាំងពីឆ្នាំ ២០១៩ ពីបទស៊ីសំណូក ការក្លែងបន្លំ និងការរំលោភលើទំនុកចិត្ត ដែលជាការចោទប្រកាន់ដែលលោកបានបដិសេធ និងហៅថាជា «ការតាមប្រមាញ់មេធ្មប់» ផ្នែកនយោបាយ។ ការសម្រេចរបស់តុលាការនេះ កើតឡើងខណៈដែលការយកចិត្តទុកដាក់លើការដោះស្រាយជម្លោះនៅតំបន់ហ្គាហ្សាបានកើនឡើង បន្ទាប់ពីសហរដ្ឋអាមេរិក និងអ៊ីស្រាអែលបានទម្លាក់គ្រាប់បែកលើរោងចក្រនុយក្លេអ៊ែរអ៊ីរ៉ង់កាលពីសប្តាហ៍មុន៕

ព័ត៌មានទាក់ទង