ខេត្តព្រៃវែង៖លោក ជាម ប៉េអា ក្នុងនាមតំណាងរាស្រ្ត និងប្រជាជនមានសេចក្តីសោមនស្សរីករាយ ដែលក្រុមគ្រូពេទ្យស្ម័គ្រចិត្តខ្មែរ-បារាំង តាមរយៈអង្គការ SOS ដើម្បីកុមារកម្ពុជា បានចុះពិនិត្យសុខភាព និងព្យាបាលជំងឺឥតគិតថ្លៃ ជូនពុកម៉ែបងប្អូនដែលអញ្ជើញមកពី៣ភូមិ ក្នុងស្រុកស៊ីធរកណ្តាល ខេត្តព្រៃវែង ដោយបញ្ជាក់ឱ្យឃើញពីការយកចិត្តទុកដាក់គិតគូរពីសុខទុក្ខ និងជីវភាព រស់នៅរបស់ប្រជាពលរដ្ឋពីសំណាក់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ព្រមទាំងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីអាណត្តិទី៧ ផងដែរ។ យើងពិតជាមានភ័ព្វសំណាងដែលមានថ្នាក់ដឹកនាំល្អ ហើយនឹងមានថ្នាក់ដឹកនាំបន្តវេនល្អៗបន្ថែមទៀត។ លោក ជាម ប៉េអា តំណាងរាស្រ្តមណ្ឌលខេត្តព្រៃវែង និងជាអនុប្រធានសហភាពសហព័ន្ធយុវជនកម្ពុជា ខេត្តព្រៃវែង និងលោក ខៀវ ភារិទ្ធ រដ្ឋលេខាធិការក្រសួងមហាផ្ទៃ និងជាប្រធានសហភាពសហព័ន្ធយុវជនកម្ពុជា ខេត្តព្រៃវែងអមដំណើរដោយលោក ប៉ុន សុខអូន អភិបាលរងស្រុក តំណាង លោក យឹម យូគង់ អភិបាលស្រុកស៊ីធរកណ្ដាល ព្រមទាំងសមាជិក សមាជិកា ស.ស.យ.ក ខេត្ត ស្រុក និងឃុំ នាព្រឹកថ្ងៃទី៩ ខែសីហា ឆ្នាំ២០២៥ បានអញ្ជើញជាអធិបតីក្នុងពិធីពិនិត្យព្យាបាលជំងឺជូនប្រជាពលរដ្ឋដោយឥតគិតថ្លៃចំនួន៦០០គ្រួសារ ក្រោមជំនួយឧបត្ថម្ភពីក្រុមគ្រូពេទ្យស្ម័គ្រចិត្តខ្មែរ-បារាំង តាមរយៈអង្គការ SOS ដើម្បីកុមារកម្ពុជា និងចែកធីបជូនសិស្សានុសិស្សចំនួន៣០០នាក់ ស្ថិតក្នុងភូមិរលាំង ឃុំរំលេច នៅស្រុកស៊ីធរកណ្តាល ខេត្តព្រៃវែង។ លោក ជាម ប៉េអា បានបន្តថា ក្រុមគ្រូពេទ្យស្ម័គ្រចិត្តខ្មែរ-បារាំង តាមរយៈអង្គការ SOS ដើម្បីកុមារកម្ពុជា បានចុះមកពិនិត្យ ព្យាបាលជំងឺជូនប្រជាពលរដ្ឋទូទៅនៅស្រុកស៊ីធរកណ្តាល ខេត្តព្រៃវែង ដោយមិនប្រកាន់និន្នាការនយោបាយ សាសនា វណ្ណៈឡើយ គឺក្នុងគោលបំណងរួមចំណែកបន្ថែមក្នុងការបំប៉ន លើកកម្ពស់សុខុមាលភាព និងកាត់បន្ថយភាពក្រីក្រជូនប្រជាពលរដ្ឋ។ ក្នុងឱកាសនោះដែរប្រជាពលរដ្ឋដែលបានមកទទួលសេវាពិនិត្យ និងព្យាបាលជំងឺដោយឥតគិតថ្លៃ មានអំណរសាទរ និងមានអារម្មណ៍សប្បាយរីករាយយ៉ាងក្រៃលែង ដែលក្រុមគ្រូពេទ្យស្ម័គ្រចិត្តខ្មែរ-បារាំង តាមរយៈអង្គការ SOS ដើម្បីកុមារកម្ពុជា បានចុះមកពិនិត្យ និងព្យាបាលជំងឺដោយឥតគិតថ្លៃដោយផ្ទាល់ នៅក្នុងស្រុកស៊ីធរកណ្តាលនាពេលនេះ និងបានថ្លែងអំណរគុណចំពោះសកម្មភាពរបស់ក្រុមគ្រូពេទ្យស្ម័គ្រចិត្តទាំងអស់ និងអ្នកតំណាងរាស្រ្ត ដេីម្បីសុខភាពប្រជាជន ព្រមទាំងក្រុមការងារចុះជួយឃុំ ស្រុក ក្នុងខេត្តព្រៃវែង។ ក្នុងឱកាសនោះ លោក ជាម ប៉េអា និងលោក ខៀវ ភារិទ្ធ និងក្រុមគ្រូពេទ្យស្ម័គ្រចិត្តខ្មែរ-បារាំង បានចែកធិបដល់ប្រជាពលរដ្ឋចំនួន៦០០នាក់ និងសិស្សានុសិស្សចំនួន៣០០នាក់ផងដែរ៕

ព័ត៌មានទាក់ទង