ម៉ាឡេស៊ី៖ ថ្លែងក្នុងសន្និសីទសារព័ត៌មាន នៅរសៀល ថ្ងៃទី០៧ ខែសីហា ឆ្នាំ២០២៥នេះ លោកស្រី ម៉ាលី សុជាតា អ្នកនាំពាក្យក្រសួងការពារជាតិ បានអះអាងថា នៅក្នុងកិច្ចប្រជុំពិសេស GBC ភាគីទាំងពីរបានព្រមព្រៀងគ្នាអនុវត្តតាមច្បាប់មនុស្សធម៌អន្តរជាតិ ក្នុងការរ៉ាប់រងព្យាបាលទាហានដែលត្រូវបានចាប់ខ្លួន រួមបញ្ចូលទាំងការរ៉ាប់រងលើជីវភាពរស់នៅ កន្លែងស្នាក់នៅ ម្ហូបអាហារ និងការថែទាំសុខភាពពួកគាត់ ក្នុងករណីមានរបួស ប្រសិនបើភាគីណាមួយ មានបំណងចង់ស្នើយកទាហាន ឬពលរដ្ឋរបស់ខ្លួនដែលរងរបួស ប៉ុន្តែមិនស្ថិតក្រោមការគ្រប់គ្រងរបស់ភាគីម្ខាងទៀត។ នៅក្នុងកិច្ចប្រជុំវិសាមញ្ញគណៈកម្មាធិការកិច្ចការព្រំដែនទូទៅកម្ពុជា-ថៃ (GBC) កម្ពុជា-ថៃ បានព្រមព្រៀងគ្នា១៣ចំណុច ដើម្បីកាត់បន្ថយភាពតានតឹង ដោយក្នុងនោះក៏មានលើកឡើងពាក់ព័ន្ធនឹងការបញ្ជូនទាហានដែលត្រូវចាប់ខ្លួនផងដែរ។ លោកស្រីបានបន្តបញ្ជាក់ថា៖ «ទាហានដែលត្រូវបានចាប់ខ្លួន ត្រូវតែដោះលែង និងបញ្ជូនភ្លាមៗឱ្យត្រលប់មកប្រទេសខ្លួនវិញ បន្ទាប់ពីការបញ្ចប់បទឈប់បាញ់យ៉ាងសកម្ម ដោយយោងតាមមាត្រា១១៨ នៃអនុសញ្ញាទី៣ ទីក្រុងហ្សឺណែវ ឆ្នាំ១៩៤៩ និងបទបញ្ជា ១២៨() នៃច្បាប់មនុស្សធម៌អន្តរជាតិ»។ កិច្ចប្រជុំវិសាមញ្ញគណៈកម្មាធិការកិច្ចការព្រំដែនទូទៅកម្ពុជា-ថៃ (GBC) បានធ្វើឡើងនៅទីក្រុងកូឡាឡាំពួរ នារសៀល ថ្ងៃទី០៧ ខែសីហា ឆ្នាំ២០២៥នេះ ដោយភាគីកម្ពុជាដឹកនាំដោយ នាយឧត្តមសេនីយ៍ ទៀ សីហា ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងភាគីថៃដឹកនាំដោយ រដ្ឋមន្ត្រីស្តីទីក្រសួងការពារជាតិថៃ លោក ណាត់ថាក់ផុន ណាកផានីត។ កិច្ចប្រជុំនេះ ធ្វើឡើង ក្រោមការសម្របសម្រួលពី នាយករដ្ឋមន្ដ្រីម៉ាឡេស៉ី ដែលជាប្រធានអាស៊ានប្ដូរវេន និងមានការចូលរួមពីតំណាងសហរដ្ឋអាេមរិក និងសាធារណៈរដ្ឋប្រជាមានិតចិនផងដែរ៕

ព័ត៌មានទាក់ទង