នេះគឺជាលើកដំបូងដែលទីក្រុងសេអ៊ូលធ្វើសេចក្ដីថ្លែងការណ៍បែបនេះ ចាប់តាំងពីលោក Lee Jae Myung បានឡើងកាន់តំណែងជាប្រធានាធិបតីកូរ៉េខាងត្បូង ក្នុងរយៈពេលជាង២ខែមកនេះ និងបន្ទាប់ពី កូរ៉េខាងត្បូងដកឧបករណ៍បំពងសំឡេងចេញពីតំបន់ព្រំដែន។ យោធាកូរ៉េខាងត្បូងមិនបានបញ្ជាក់លម្អិតពីទីតាំងដែលកូរ៉េខាងជើងបានដកឧបករណ៍បំពងសំឡេងចេញនោះទេ ហើយក៏មិនទាន់ច្បាស់នោះដែរ ថាតើទីក្រុងព្យុងយ៉ាងនឹងដកឧបករណ៍បំពងសំឡេងទាំងអស់ចេញពីព្រំដែនឬក៏យ៉ាងណានោះដែរ? យោធាកូរ៉េខាងត្បូង នៅថ្ងៃសៅរ៍ ទី៩ ខែសីហា បានឱ្យដឹងថាយោធាកូរ៉េខាងជើងបានដកឧបករណ៍បំពងសំឡេងមួយចំនួនដែលតម្រង់ទៅរកកូរ៉េខាងត្បូង ចេញពីផ្នែកខ្លះនៃតំបន់ព្រំដែន បន្ទាប់ពី កូរ៉េខាងត្បូងបានធ្វើដូចគ្នានេះដែរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ គួរបញ្ជាក់ថា ដើម្បីបន្ធូរបន្ថយភាពតានតឹងជាមួយកូរ៉េខាងជើង រដ្ឋាភិបាលកូរ៉េខាងត្បូងរបស់លោក Lee Jae Myung បានបិទឧបករណ៍បំពងសំឡេងដែលត្រូវបានដាក់ពង្រាយនៅតាមបណ្ដោយព្រំដែន ដើម្បី រិះគន់កូរ៉េខាងជើង ភ្លាមៗក្រោយរូបលោកឡើងកាន់តំណែងប្រធានាធិបតីកូរ៉េខាងត្បូង។ រហូតដល់ថ្ងៃចន្ទដើមសប្ដាហ៍កន្លងទៅនេះ អាជ្ញាធរកូរ៉េខាងត្បូងបានចាប់ផ្ដើមដកឧបករណ៍បំពងសំឡេងចេញពីព្រំដែន ខណៈ លោក Lee កំពុងព្យាយាមស្ដារកិច្ចសន្ទនាឡើងវិញជាមួយកូរ៉េខាងជើង៕

ព័ត៌មានទាក់ទង