ទីភ្នាក់ងារព័ត៌មានរ៉យទ័របានរាយការណ៍ថា តម្លៃអង្ករប្រភេទបាក់ ៥% របស់ប្រទេសថៃបានបន្តឡើងថ្លៃរហូតដល់ ៦៣២ ទៅ ៦៤០ដុល្លារក្នុងមួយតោនធៀបនឹង ៦០០ដុល្លារកាលពីសប្តាហ៍មុន។ តម្លៃនាំចេញអង្កររបស់ប្រទេសថៃ បានកើនឡើងដល់កម្រិតខ្ពស់ ក្នុងរយៈពេលជាងបីខែ ដោយសារការផ្គត់ផ្គង់តិចតួច និងតម្រូវការខ្លាំង ខណៈដែលតម្លៃនាំចេញរបស់អង្ករឥណ្ឌា នៅតែមានកម្រិតថេរដោយសារតម្រូវការមិនសូវល្អ។ នេះបើយោងតាមទីភ្នាក់ងារព័ត៌មានរ៉យទ័រ។ ពាណិជ្ជករមួយរូប ដែលមានមូលដ្ឋាននៅទីក្រុងបាងកក បានប្រាប់រ៉យទ័រថា ការកើនឡើងនេះគឺដោយសារតែការផ្គត់ផ្គង់ធ្លាក់ចុះ។ ពាណិជ្ជករដដែលបានបន្ថែមថា មានតម្រូវការខ្លាំងពីប្រទេសឥណ្ឌូនេស៊ី និងប្រេស៊ីលដែលរងគ្រោះដោយទឹកជំនន់។ ការជន់លិចដីស្រែចំការ និងទីប្រជុំជននៅភាគខាងត្បូងប្រទេសប្រេស៊ីល បានសម្លាប់មនុស្ស សត្វពាហនៈ បង្កឱ្យជាប់គាំងហេដ្ឋារចនាសម្ព័ន្ធ និងកំពុងរារាំងការដឹកជញ្ជូនគ្រាប់ធញ្ញជាតិនានា ទៅកាន់រោងចក្រកែច្នៃក្នុងស្រុក និងកំពង់ផែ Rio Grande។ ពាណិជ្ជករដែលមានមូលដ្ឋាននៅទីក្រុងបាងកកម្នាក់ទៀត បាននិយាយថា តម្រូវការនិងសកម្មភាពក្នុងស្រុកក៏មានភាពអ៊ូអរផងដែរ ហើយការផ្គត់ផ្គង់ថ្មីនឹងមកដល់ក្នុងខែកក្កដា។ អង្ករប្រភេទស្ងោរបាក់ ៥% របស់ឥណ្ឌាមានតម្លៃពី ៥៣១ ដល់ ៥៣៩ដុល្លារក្នុងមួយតោនក្នុងសប្តាហ៍នេះដែលមិនផ្លាស់ប្តូរធៀបនឹងសប្តាហ៍មុន។ ទន្ទឹមនឹងនេះដែរ អង្ករប្រភេទបាក់ ៥% ពីប្រទេសវៀតណាមមាតម្លៃពី ៥៨៥ ទៅ ៥៩០ដុល្លារក្នុងមួយតោននៅថ្ងៃព្រហស្បតិ៍ កើនឡើងពី ៥៨៥ដុល្លារក្នុងសប្តាហ៍កន្លងមក។ នេះបើយោងតាមទីភ្នាក់ងារព័ត៌មានរ៉យទ័រ៕

ព័ត៌មានទាក់ទង