ព្រឹត្តិការណ៍នេះចាប់ផ្តើមដោយសមាគមន៍ Fragments Vitae Asia និងក្រុមសហគមន៍ Peace and Solidarity in Southeast Asia ដែលត្រូវបានរៀបចំឡើងត្រឹមតែរយៈពេលតែ២ថ្ងៃប៉ុណ្ណោះ ដើម្បគាំទ្រគ្រួសារ ដែលបានចាកចេញពីតំបន់ព្រំដែន (ជនភៀសសឹក) និង កុមារក្រីក្រដែលទទួលបានការថែទាំពីអង្គការ Tiny Toones។ ព្រឹត្តិការណ៍ Border Sâmaki បានក្លាយជាការប្រមូលផ្តុំ Hip-Hop សប្បុរសធម៌ដ៏ធំបំផុតនៅកម្ពុជា នាឆ្នាំ២០២៥នេះ ដោយបាននាំយកសិល្បករ ចំនួន៤០នាក់ និងអ្នកទស្សនាជាង៤០០នាក់ មកជួបជុំគ្នានៅ B Box Factory ក្នុងរាជធានីភ្នំពេញកាលពីថ្ងៃទី០៦ ខែកញ្ញា ឆ្នាំ២០២៥។ ជាមួយនឹងតម្លៃសំបុត្រចូលរួមត្រឹមតែ2.5ដុល្លារ ព្រឹត្តិការណ៍នៅយប់នោះ បានបង្កើតបានប្រាក់ចំណូលជាង១៥០០ដុល្លារ រួមទាំងការលក់សំបុត្រ ការចូលរួមបរិច្ចាគ និងចំណូលពីបារថែមទៀត។ ចំនួនប្រាក់ចំណូលនេះ នឹងត្រូវបរិច្ចាគទាំងស្រុងឲ្យទៅអង្គការ Tiny Toones ដែលបានធ្វើការយ៉ាងសកម្មអស់រយៈពេលជាង២០ឆ្នាំ ដើម្បីផ្តល់ការអប់រំសុវត្ថិភាព និងក្តីសង្ឃឹមដល់កុមាររងគ្រោះរាប់រយនាក់ និងដល់អង្គការ NGO ដែលជួយដល់អ្នករងផលប៉ះពាល់ដោយសារជម្លោះព្រំដែនកម្ពុជា-ថៃ។ សហគមន៍ Border Sâmaki បានប្រមូលផ្តុំតារាល្បីៗជាច្រើនរូប នៅក្នុងវិស័យ Hip-Hop កម្ពុជា និងអាស៊ីអាគ្នេយ៍រួមមាន សិល្បករពីក្រុមហ៊ុន Hip-Hop ដំបូងរបស់កម្ពុជា KlapYaHandz (Vuthea, Izame Siva, 4mara), លោក OG Golden និង Toro អ្នកឈ្នះពានរង្វាន់ និងអ្នកឈានចូលដល់វគ្គចុងក្រោយនៃកម្មវិធី Rapper Fighter Cambodia Beer, Tagmez, Zoker & 2MDIE។ បន្ថែមពីនោះ ក៏មានការរាំ Hip-Hop Freestyle ពីកុមាររបស់ Tiny Toones និងក្រុមរាំ Breaking ជាតិអូឡាំពិកកម្ពុជា (B-Boy Slick, B-Girl Nailaa និងសិល្បកររាំដទៃទៀត) + WBC Crew និងមានការសម្តែងពី DJ Sets ពី CP5 Crew (Deejay Jackson & DJ Illest), Larry Zinc & Miss Wii ផងដែរ។ សិល្បករទាំងអស់បានចូលរួមសម្តែងដោយឥតគិតថ្លៃ។ គួរបញ្ជាក់ថា Border Sâmaki មិនមែនត្រឹមតែការប្រគំតន្ត្រីទេ វាជាសហគមន៍ Hip-Hop ដែលបង្រួបបង្រួមយុវជន បំបែកឧបសគ្គ និងកសាងអនាគត៕

ព័ត៌មានទាក់ទង