សូមជម្រាបផងថា សម្រាប់ដំណឺងថ្មីនេះ គឺត្រូវបានប្រកាសនៅអំឡុងពេលកិច្ចប្រជុំកំពូលអាស៊ានលើកទី៤៧ នៅទីក្រុងកូឡាឡាំពួរកាលពីថ្ងៃអាទិត្យ ជាកន្លែងដែលប្រធាន FIFA លោក Gianni Infantino និងអគ្គលេខាធិការអាស៊ាន លោក កៅ គឹមហួន បានចុះហត្ថលេខាលើអនុស្សរណៈនៃការយោគយល់ ។ ប្រធានសហព័ន្ធបាល់ទាត់អន្តរជាតិ (FIFA) លោក Gianni Infantino បានប្រកាសនឹងរៀបចំព្រឹត្តិការណ៍ការប្រកួតដណ្តើមពារង្វាន់តំបន់អាស៊ានថ្មីមួយទៀត (FIFA ASEAN Cup) សម្រាប់ ១១ប្រទេសតំបន់អាស៊ានប្រកួតប្រជែង ។ ការប្រកួតពានថ្មីមួយនេះ គឺនឹងត្រូវដាក់ឱ្យដំណើរការជាផ្នែកមួយនៃកិច្ចព្រមព្រៀងរវាង FIFA និងសមាគមប្រជាជាតិអាស៊ីអាគ្នេយ៍ (អាស៊ាន) ដែលមានគោលបំណងជំរុញការអភិវឌ្ឍបាល់ទាត់នៅទូទាំងតំបន់។ ការប្រកួតនេះនឹងប្រមូលផ្តុំក្រុមជម្រើសជាតិ ដែលស្ថិតក្នុងសមាជិកអាស៊ានទាំងអស់ គឺដូចទៅនឹងព្រឹត្តិការណ៍ពានរង្វាន់ Arab Cup ដែលត្រូវបានរៀបចំឡើងជាលើកដំបូងដោយ FIFA ក្នុងឆ្នាំ២០២១ ។ លោក Infantino បានមានប្រសាសន៍ថា «ពានរង្វាន់ថ្មីនេះ នឹងក្លាយជាការបន្ថែមដ៏អស្ចារ្យមួយទៅក្នុងប្រតិទិនបាល់ទាត់ក្នុងតំបន់ តាមរយៈពានរង្វាន់ FIFA ASEAN Cup យើងកំពុងបង្រួបបង្រួមប្រទេសនានាជាមួយគ្នា ហើយការប្រកួតនេះនឹងទទួលបានភាពជោគជ័យយ៉ាងធំធេង ព្រោះវានឹងជួយជំរុញវិស័យបាល់ទាត់ក្រុមជម្រើសជាតិនៅក្នុងតំបន់អាស៊ាន និងគាំទ្រដល់ការអភិវឌ្ឍកីឡានៅទូទាំងអាស៊ីអាគ្នេយ៍» ។ ស្ថាប័នគ្រប់គ្រងបាល់ទាត់ពិភពលោក FIFA នឹងធ្វើការជាមួយភាគីពាក់ព័ន្ធក្នុងតំបន់ រួមទាំងសហព័ន្ធបាល់ទាត់អាស៊ី សហព័ន្ធបាល់ទាត់អាស៊ាន និងសមាគមសមាជិក FIFA ដែលពាក់ព័ន្ធ ដើម្បីរៀបចំទម្រង់នៃការប្រកួត ៕

ព័ត៌មានទាក់ទង