ទីភ្នាក់ងារ Antara បានដកស្រង់សម្តីមន្ត្រីគ្រោះមហន្តរាយ លោក Budi Irawan ដែលនិយាយថា ការបាក់ដីនៅទីក្រុង Cilacap បានកប់ផ្ទះរាប់សិបខ្នងក្នុងភូមិ Cibeunying បណ្តាលឱ្យមនុស្ស ៣នាក់ស្លាប់កាលពីថ្ងៃព្រហស្បតិ៍។ ដោយឡែកសាកសពមនុស្ស ៣ត្រូវបានរកឃើញបន្ថែម និងបន្តបាត់ខ្លួន ១៧នាក់។ តាមលោក Budi ទីតាំងកេីតហេតុពិបាកសម្រាប់ក្រុមសង្គ្រោះ ខណៈជនរងគ្រោះអាចជាប់ក្រោមដីក្នុងជម្រៅពី ៣ទៅ ៨ម៉ែត្រ។ ទីភ្នាក់ងារសារព័ត៌មានរដ្ឋ Antara បានរាយការណ៍នាថ្ងៃសៅរ៍ ទី១៥ ខែវិច្ឆិកាថា បំណាក់ដីនៅភាគកណ្តាលខេត្ត Java ប្រទេសឥណ្ឌូណេស៉ី បណ្តាលឱ្យអ្នកស្លាប់កេីនដល់ ៦នាក់ និង ១៧នាក់កំពុងបាត់ខ្លួនបន្ទាប់ពីភ្លៀងបន្តធ្លាក់។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។ គួរបញ្ជាក់ថា រដូវវស្សានៅក្នុងប្រទេសឥណ្ឌូណេស៉ី​ ចាប់ផ្តើមពីខែកញ្ញាហើយបន្តដល់ខែមេសា ដែលនាំមកនូវហានិភ័យខ្ពស់នៃទឹកជំនន់ និងភ្លៀងធ្លាក់ខ្លាំងនៅក្នុងតំបន់ជាច្រើន។ កាលពីខែមករា បំណាក់ដីដែលបង្កឡើងដោយភ្លៀងធ្លាក់ខ្លាំងនៅក្រុងPekalongan ភាគកណ្តាលខេត្ត Java បានសម្លាប់មនុស្សយ៉ាងតិច ២៥នាក់៕

ព័ត៌មានទាក់ទង