លោកស្រី Lila Ibrahim ប្រធានផ្នែកប្រតិបត្តិការរបស់ Google DeepMind បានគូសបញ្ជាក់ថា ទិសដៅស្រាវជ្រាវរបស់មន្ទីរពិសោធន៍ថ្មីនេះនឹងផ្តោតការយកចិត្តទុកដាក់លើការអនុវត្តបច្ចេកវិទ្យា AI ទៅលើវិស័យអាទិភាពចំនួនបីគឺ៖ ការអប់រំ សុខាភិបាល និងវិទ្យាសាស្ត្រ។ តាមរយៈការផ្តោតលើវិស័យទាំងនេះ ក្រុមហ៊ុនរំពឹងថាការស្រាវជ្រាវរបស់ខ្លួននឹងអាចចូលរួមចំណែកយ៉ាងសកម្មក្នុងការ ដោះស្រាយបញ្ហាប្រឈមជាក់ស្តែង ក្នុងតំបន់ និងលើកកម្ពស់ការប្រើប្រាស់បច្ចេកវិទ្យាទំនើបនេះប្រកបដោយ ប្រសិទ្ធភាព និងភាពច្នៃប្រឌិត។ ក្រុមហ៊ុន Google DeepMind ដែលជាបុត្រសម្ព័ន្ធឈានមុខគេផ្នែកស្រាវជ្រាវបញ្ញាសិប្បនិមិត្ត (AI) របស់ក្រុមហ៊ុនមេ Alphabet បានប្រកាសជាផ្លូវការអំពីការបង្កើត មន្ទីរពិសោធន៍ស្រាវជ្រាវ ថ្មីមួយនៅប្រទេសសិង្ហបុរី។ គោលដៅស្នូលនៃមជ្ឈមណ្ឌលនេះ គឺដើម្បីពង្រឹងកិច្ចសហប្រតិបត្តិការលើបច្ចេកវិទ្យា AI ជាមួយ រដ្ឋាភិបាល វិស័យឯកជន (ក្រុមហ៊ុនអាជីវកម្ម) និងស្ថាប័នសិក្សានៅទូទាំងតំបន់អាស៊ី។ ដើម្បីត្រៀមខ្លួនសម្រាប់ប្រតិបត្តិការនេះ ក្រុមហ៊ុនបានបញ្ជាក់ថា ខ្លួនបានបង្កើនចំនួនក្រុមការងារនៅទ្វីបអាស៊ី ទ្វេដង រួចមកហើយក្នុងរយៈពេលមួយឆ្នាំចុងក្រោយ ហើយកំពុងបន្តជ្រើសរើសបុគ្គលិកបន្ថែមទៀត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន​ Reuters នៅថ្ងៃទី១៩ ខែវិច្ឆិកា ឆ្នាំ២០២៥។ គួរជម្រាបថា ការសម្រេចចិត្តដាក់មូលដ្ឋាននៅសិង្ហបុរីនេះ គឺឆ្លុះបញ្ចាំងពី សក្តានុពលដ៏ធំធេង នៃតំបន់អាស៊ីអាគ្នេយ៍។ នាយកប្រតិបត្តិរបស់ក្រុមហ៊ុនបានអះអាងថា ទីផ្សារមួយចំនួននៅក្នុងតំបន់នេះមាន អត្រាទទួលយកបច្ចេកវិទ្យា AI ខ្ពស់បំផុតលើពិភពលោក។ វត្តមានរបស់ Google DeepMind នឹងក្លាយជាកម្លាំងចលករដ៏សំខាន់មួយក្នុងការ ពន្លឿនការអភិវឌ្ឍ និងជំរុញការអនុវត្តបច្ចេកវិទ្យា AI ឲ្យកាន់តែទូលំទូលាយនិងស៊ីជម្រៅក្នុងចំណោមប្រទេសនានានៅក្នុងទ្វីបអាស៊ី៕

ព័ត៌មានទាក់ទង