វត្ត Wat Rat Prakhong Tham នៅក្នុងខេត្ត Nonthaburi ស្ថិតនៅជាយទីក្រុងបាងកក បានបង្ហោះវីដេអូមួយនៅលើទំព័រ Facebook ដោយបង្ហាញពីស្ត្រីម្នាក់ដែលកំពុងដេកនៅក្នុងមឈូស ពណ៌សនៅលើរថយន្ដ pick-up ពណ៌ខ្មៅមួយគ្រឿង កម្រើកដៃ និងក្បាល។ លោក Pairat Soodthoop ជាអ្នកចាត់ការទូទៅផ្នែកហិរញ្ញវត្ថុរបស់វត្តខាងលើបានប្រាប់ទីភ្នាក់ងារសារព័ត៌មាន AP កាលពីថ្ងៃចន្ទ ទី២៤ ខែវិច្ឆិកាថាបងប្អូនប្រុសរបស់ស្ត្រីមា្នក់អាយុ ៦៥ឆ្នាំ បានដឹកសពស្ត្រីរូបនេះមកពីខេត្ត Phitsanulok ដើម្បីបូជា។ ប៉ុន្តែលោកស្រាប់តែស្ដាប់ឮសូរស្នូរគោះចេញពីមឈូស។ «ខ្ញុំពិត ជាមានការភ្ញាក់ផ្អើលបន្តិច ដូច្នេះខ្ញុំក៏បានសុំឱ្យបើកគម្របមឈូស ហើយអ្នករាល់គ្នាភ្ញាក់ផ្អើលយ៉ាងខ្លាំង។ ខ្ញុំបានឃើញស្ត្រីរូបនោះកម្រើកភ្នែក និងកំពុងគោះមឈូស»។​ នេះជាការលើកឡើងរបស់លោក Pairat។ រឿងដ៏គួរឱ្យភ្ញាក់ផ្អើលមួយបានកើតឡើងនៅក្នុងប្រទេសថៃ ក្រោយស្ត្រីម្នាក់ត្រូវបានគេរកឃើញថានៅមានជីវិតដោយរូបនាងចាប់កម្រើកនៅក្នុងមឈូសមួយដែលគេបម្រុងនឹងយកទៅបូជា។ នេះបើតាមការចេញផ្សាយដោយសារព័ត៌មាន CNA។ លោក Pairat បានបន្ថែមថាបងប្អូនប្រុសរបស់ស្ត្រីខាងលើបាននិយាយថាស្ត្រីរូបនេះបានគេងឈឺនៅលើគ្រែជាង ២ឆ្នាំ ហើយកាលពីជាង២ថ្ងៃមុននេះស្ត្រីរូបនេះលែងដកដង្ហើម។ ជាហេតុធ្វើឱ្យ សាច់ញាតិជឿថារូបគាត់បានស្លាប់ និងដាក់គាត់ក្នុងមឈូសធ្វើដំណើរក្នុងចម្ងាយផ្លូវ ៥០០គីឡូម៉ែត្រ ឆ្ពោះទៅកាន់មន្ទីរពេទ្យមួយក្នុងទីក្រុងបាងកក ដើម្បីបំពេញតាមបំណងរបស់ស្រ្តីរូបដែលចង់បរិច្ចាគ សរីរាង្គ។ ប៉ុន្តែខាងមន្ទីរពេទ្យបានបដិសេធមិនទទួលនោះទេ ដោយសារតែគ្មានលិខិតបញ្ជាក់ពីមរណភាព។ ឥលូវ ស្ត្រីខាងលើត្រូវបានបញ្ជូនទៅកាន់មន្ទីរពេទ្យមួយ ហើយចៅអធិការវត្ត Wat Rat Prakhong Tham បាននិយាយថាខាងវត្តនឹងរ៉ាប់រងថ្លៃចំណាយលើការព្យាបាល៕

ព័ត៌មានទាក់ទង