រាជធានីភ្នំពេញ៖សូមបញ្ជាក់ដែរថា នេះជាលើកដំបូងដែលប្រទេសកម្ពុជា ធ្វើជាម្ចាស់ផ្ទះក្នុងការរៀបចំវេទិការួមរវាងរដ្ឋាភិបាល និងវិស័យឯកជនក្នុងតំបន់អាស៊ីលើកទី១៦ ដែលមានក្រសួងសាធារណការ និងដឹកជញ្ជូន និងអង្គការ JASIC ចូលរួមសហការក្នុងការរៀបចំឡើង។ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន នារសៀលថៃ្ងទី២៥ ខែវិច្ឆិកា ឆ្នាំ២០២៥នេះ បានអញ្ជើញជាអធិបតីបើកវេទិការួម រវាងរដ្ឋាភិបាល និងវិស័យឯកជនក្នុងតំបន់អាស៊ី លើកទី១៦ ដោយមានការចូលរួមពីលោក NAONO Takashi មន្ត្រីមកពីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន រួមទាំងមាន ថ្នាក់ដឹកនាំក្រសួង ស្ថាប័នរដ្ឋពាក់ព័ន្ធ អង្គការ JASIC (Japan Automobile Standards Internationalization Center) និងមានវិស័យឯកជនអន្តរជាតិ ជាច្រើនប្រទេសទៀតចូលរួម។ ថ្លែងនាឱកាសនោះលោក ប៉េង ពោធិ៍នា ក្នុងនាមរាជរដ្ឋាភិបាលកម្ពុជា និងក្រសួងសាធារណការ និងដឹកជញ្ជូន ក៏បានថ្លែងអំណរគុណចំពោះក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន មជ្ឈមណ្ឌលអន្តរជាតិនីយកម្មស្តង់ដាររថយន្តជប៉ុន និងដៃគូទាំងអស់ដែលបានសហការរៀបចំវេទិការួមរវាងរដ្ឋាភិបាល និងវិស័យឯកជនក្នុងតំបន់អាស៊ី លើកទី១៦ នៅកម្ពុជា។ នេះគឺជាព្រឹត្តិការណ៍ដ៏សំខាន់មួយសម្រាប់ប្រទេសកម្ពុជា ខណៈដែលមានក្រុមហ៊ុនផលិតរថយន្ត អ្នកផ្គត់ផ្គង់ អ្នកស្រាវជ្រាវ និងដៃគូអភិវឌ្ឍន៍ ដែលសុទ្ធតែបានប្តេជ្ញាចិត្តចំពោះគោលដៅរួមមួយគឺ ពង្រឹងកិច្ចសហប្រតិបត្តិការក្នុងតំបន់ និងជំរុញកំណើនប្រកបដោយចីរភាពនៃឧស្សាហកម្មរថយន្តក្នុងតំបន់អាស៊ី តាមរយៈការដោះស្រាយបញ្ហាប្រឈម ការសម្របសម្រួលស្តង់ដារ និងការកែលម្អការប្រកួតប្រជែងក្នុងតំបន់។ លោករដ្ឋមន្ត្រី បានបន្ថែមដែរថា វិស័យយានយន្ត គឺជាម៉ាស៊ីនដ៏សំខាន់មួយក្នុងការជំរុញឧស្សាហូបនីយកម្ម និងសមាហរណកម្មសេដ្ឋកិច្ចនៅក្នុងតំបន់របស់យើង។ នៅទូទាំងទ្វីបអាស៊ី ឧស្សាហកម្មនេះគាំទ្រដល់ការងាររាប់លានកន្លែង លើកកម្ពស់នវានុវត្តន៍ និងបម្រើជាកាតាលីករសម្រាប់ពាណិជ្ជកម្ម និងការវិនិយោគ។ សព្វថ្ងៃនេះតំបន់របស់យើងឈរនៅចំណុចរបត់ដ៏សំខាន់មួយ ហើយចំពោះយានយន្តសកលក៏កំពុងវិវត្តយ៉ាងឆាប់រហ័ស ដែលបង្កើតឡើងដោយការផ្លាស់ប្តូរ បច្ចេកវិទ្យា តម្រូវការបរិស្ថាន និងការតភ្ជាប់ឌីជីថល។ យើងកំពុងឃើញសម័យកាលថ្មីមួយ ដែលកំណត់ដោយអគ្គិសនីភាវូបនីយកម្ម ស្វ័យប្រវត្តិកម្ម និងប្រព័ន្ធចល័តឆ្លាតវៃ។ សម្រាប់ប្រទេសកម្ពុជា ការផ្លាស់ប្តូរនេះបង្ហាញទាំងឱកាស និងបញ្ហាប្រឈម, ខណៈប្រព័ន្ធអេកូឡូស៊ីយានយន្តនៅតែស្ថិតក្នុងដំណាក់កាលដំបូង ហើយយើងកំពុងសម្រេចបានវឌ្ឍនភាពជាលំដាប់។ ក្នុងរយៈពេលប៉ុន្មានឆ្នាំចុងក្រោយនេះ រាជរដ្ឋាភិបាលកម្ពុជា បានផ្តល់អាទិភាពដល់គោលនយោបាយដែលលើកកម្ពស់ការចែកចាយថាមពលអគ្គិសនី, សុវត្ថិភាពយានយន្ត, កិច្ចការពារបរិស្ថាន និងការសម្របសម្រួលស្របតាមស្តង់ដារក្នុងតំបន់ផងដែរ។ គួរជម្រាបដែរថា វេទិកានេះមានគោលបំណងដើម្បីផ្សព្វផ្សាយ និងជំរុញប្រទេសក្នុងតំបន់អាស៊ី ចូលជាភាគីនៃកិច្ចព្រមព្រៀងឆ្នាំ១៩៥៨ ស្តីពីការទទួលយកបទប្បញ្ញត្តិបច្ចេកទេសរួមនៃអង្គការសហប្រជាជាតិសម្រាប់យានយន្ត និងគ្រឿងបន្លាស់ដែលអាចបំពាក់ និងប្រើប្រាស់ទៅលើយានយន្ត និងលក្ខខណ្ឌសម្រាប់ការទទួលស្គាល់ទៅវិញទៅមក នៃការផ្តល់អនុលោមភាពដោយឈរលើមូលដ្ឋាននៃបទប្បញ្ញត្តិអង្គការសហប្រជាជាតិ។ វេទិកានេះក៏ដើម្បីផ្សព្វផ្សាយរបាយការណ៍ស្តីពីលទ្ធផលនៃកិច្ចប្រជុំក្រុមការងារបច្ចេកទេស (WP29) ចំនួន ៣ដង នៅទីក្រុង ហ្សឺណែវ ប្រទេសស្វីស និងកិច្ចប្រជុំ ITC មាន ១ដងក្នុងមួយឆ្នាំ ដើម្បីធ្វើការអនុម័តកែប្រែ និងទទួលយកបទប្បញ្ញត្តិបច្ចេកទេសថ្មីៗ នៃការផលិតយានយន្តសកល ដែលប្រទេសអ្នកផលិតបានស្នើសុំកែសម្រួល ឬបង្កើតថ្មីៗ។ របាយការណ៍លើកឡើងពីវិស័យឯកជន /អ្នកផលិត ពីបញ្ហាប្រឈមផ្សេងៗក្នុងវិស័យយានយន្តសកល និងស្វែងរកដំណោះស្រាយរួមគ្នាដូចជា៖ ផលប៉ះពាល់បរិស្ថាន ការបម្រែបម្រួលអាកាសធាតុជាដើម និងធ្វើស្តង់ដាតែមួយលើការផលិតតាមរយៈស្តង់ដាបច្ចេកទេស និងបទប្បញ្ញត្តិរួមក្នុងវិស័យយានយន្តសកល ដើម្បីកាត់បន្ថយរនាំងបច្ចេកទេសក្នុងឧស្សាហកម្មយានយន្ត៕

ព័ត៌មានទាក់ទង