នៅក្នុងបទសម្ភាសន៍ជាមួយវិទ្យុ RTL លោក ម៉ាក្រុង បាននិយាយថា «យើងនឹងខុស ប្រសិនបើយើងបង្ហាញភាពទន់ខ្សោយនៅចំពោះមុខការគំរាមកំហែងនេះ...យើងត្រូវតែបង្ហាញថាយើងមិនទន់ខ្សោយប្រឆាំងនឹងអំណាចដែលគំរាមកំហែងយើងខ្លាំងបំផុតនោះទេ»។ ប្រធានាធិបតីបារាំង លោក អេម៉ានុយអែល ម៉ាក្រុង បានថ្លែងនៅថ្ងៃអង្គារនេះថា ប្រទេសបារាំងមិនត្រូវបង្ហាញភាព «ទន់ខ្សោយ» នៅក្នុងការប្រឈមមុខនឹងការគំរាមកំហែងពីរុស្ស៊ីឡើយ ប៉ុន្តែលោកបានសង្កត់ធ្ងន់ថា បារាំងគ្មានចេតនា «បញ្ជូនយុវជន» ទៅប្រយុទ្ធក្នុងសង្គ្រាមអ៊ុយក្រែនទេ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។ ទោះជាយ៉ាងណា លោកបានបដិសេធយ៉ាងដាច់អហង្ការចំពោះគំនិតដែលថា បារាំងនឹងបញ្ជូនយុវជនទៅសមរភូមិ។ លោកបញ្ជាក់ថា «វាពិតជាចាំបាច់...ក្នុងការលុបបំបាត់គំនិតច្របូកច្របល់ណាមួយដែលបង្ហាញថាយើងនឹងបញ្ជូនយុវជនរបស់យើងទៅអ៊ុយក្រែន»។ ការបកស្រាយនេះធ្វើឡើងបន្ទាប់ពីមេទ័ពកំពូលបារាំងម្នាក់បានបង្កការព្រួយបារម្ភកាលពីសប្តាហ៍មុន ដោយព្រមានថាប្រទេសត្រូវតែត្រៀមខ្លួន «បាត់បង់កូនចៅ» ដែលលោក ម៉ាក្រុង ថាជាការដកស្រង់សម្តីខុសពីបរិបទ។ លោក ម៉ាក្រុង ត្រូវបានគេរំពឹងថានឹងប្រកាសនៅថ្ងៃព្រហស្បតិ៍អំពី «ការផ្លាស់ប្តូរសេវាកម្មជាតិទៅជាទម្រង់ថ្មី»។ ប្រភពមួយបានឱ្យដឹងថា ផែនការនេះគឺដើម្បីបណ្តុះបណ្តាលមនុស្ស ២,០០០ ទៅ ៣,០០០នាក់ក្នុងឆ្នាំដំបូង ដោយមានគោលដៅបង្កើនដល់ ៥០,០០០នាក់ក្នុងមួយឆ្នាំ។ គួរបញ្ជាក់ថា ការលើកឡើងនេះធ្វើឡើងមុនពេលកិច្ចប្រជុំតាមវីដេអូជាមួយប្រទេសចំនួន ៣០ នៃ «សម្ព័ន្ធភាពនៃអ្នកស្ម័គ្រចិត្ត» ដែលគាំទ្រទីក្រុងកៀវ។ ក្រុមនេះមានបំណងបញ្ជូនកងកម្លាំងពហុជាតិសាសន៍ដើម្បីទប់ស្កាត់ការវាយប្រហាររបស់រុស្ស៊ីនាពេលអនាគត ប្រសិនបើសង្គ្រាមបញ្ចប់ដោយបទឈប់បាញ់៕

ព័ត៌មានទាក់ទង