រាជធានីភ្នំពេញ៖អគ្គបណ្ឌិតសភាចារ្យ អូន ព័ន្ធមុនីរ័ត្ន បានគូសបញ្ជាក់ថា សេដ្ឋកិច្ចកម្ពុជា បានស្ទុះងើបឡើងវិញយ៉ាងរហ័ស និងបន្តឈរលើមាគ៌ានៃកំណើនដ៏រឹងមាំ បន្ទាប់ពីវិបត្តិនៃជំងឺកូវីដ-១៩ ជាសកល ទោះបីជាត្រូវបន្តពុះពារជម្នះ នូវបញ្ហាប្រឈម និង ភាពមិនប្រាកដប្រជាខ្ពស់ នៃស្ថានភាព តំបន់ និង សកល ដោយសារការបន្តប្រឈមមុខខាងភូមិសាស្តនយោបាយ កាន់តែស្រួចស្រាល់, ការបែកខ្ញែកនៃសេដ្ឋកិច្ចសកល ដែលប៉ះពាល់ដល់កិច្ចសហប្រតិបត្តិការ និង ពាណិជ្ជកម្មអន្ដរជាតិ, ការងើបមកវិញនៃនិន្នាការឯកតោភាគី- និយម, ភាពមិនច្បាស់លាស់នៃទស្សនវិស័យកំណើនសេដ្ឋកិច្ច នៃបណ្ដាប្រទេស និងតំបន់ ជាដៃគូពាណិជ្ជកម្មសំខាន់ៗរបស់កម្ពុជា និងការប្រែប្រួលអាកាសធាតុ។ល។ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី​ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ការកើនឡើងនូវកំណើនសេដ្ឋកិច្ច, លំហូរវិនិយោគបរទេស, ការនាំចេញ និងកំណើនភ្ញៀវទេសចរបរទេសបង្ហាញច្បាស់ថា យុទ្ធសាស្ត្របញ្ចកោណ-ដំណាក់កាលទី១ របស់រដ្ឋាភិបាល នៅតែត្រឹមត្រូវ, ចាំបាច់ និង សមស្រប​ ប៉ុន្តែ​ត្រូវ​សម្រួចបន្ថែម និង អនុវត្តប្រកបដោយភាពបត់បែន ទៅតាមនិន្នាការ និងបរិការណ៍នៃការប្រែប្រួលថ្មី។ ការលើកឡើងរបស់អគ្គបណ្ឌិតសភាចារ្យ អូន ព័ន្ធមុនីរ័ត្ន ធ្វើឡើងក្នុងពិធីប្រកាសដាក់ឲ្យអនុវត្តជាផ្លូវការនូវ «កម្មវិធីលើកកម្ពស់ភាពប្រកួតប្រជែង បង្កើនពិពិធកម្ម និងពង្រឹងភាពធន់ ដើម្បីជំរុញកំណើនសេដ្ឋកិច្ចក្នុងបរិការណ៍សកល ដែលមានភាពមិនប្រាកដប្រជាខ្ពស់របស់រាជរដ្ឋាភិបាល នីតិកាលទី៧ នៃរដ្ឋសភា» នាថ្ងៃទី២០ ខែមករា ឆ្នាំ២០២៦នេះ។ អគ្គបណ្ឌិតសភាចារ្យបន្ថែមថា ក្នុងដំណាក់កាលថ្មីនៃការបន្តខិតខំអភិវឌ្ឍប្រទេស​ចាប់តាំងពីដើមនីតិកាលទី៧​នេះ នៃរដ្ឋសភា​ រាជរដ្ឋាភិបាល បានដាក់ចេញនិង កំពុងជំរុញអនុវត្ត នូវយុទ្ធសាស្ត្របញ្ចកោណ-ដំណាក់កាលទី១, ទន្ទឹមគ្នានឹង កម្មវិធីគោលនយោបាយអាទិភាពចំនួន៦ និង វិធានការគន្លឹះ ចំនួន៥​ សំដៅខិតខំជម្នះឲ្យបាននូវបញ្ហាប្រឈម និងសម្របខ្លួនទៅនឹងការប្រែប្រួលនៃសភាពការណ៍ ដែលកើតឡើងជាបន្តបន្ទាប់ និងដំណាលៗគ្នា ដោយតម្រូវឲ្យរាជរដ្ឋាភិបាល ចាត់វិធានអន្តរាគមន៍ ឲ្យបានទាន់ពេលនិងចំទិសដៅ ប្រកបដោយប្រសិទ្ធភាព និង ស័ក្ដិសិទ្ធិភាពខ្ពស់។ អគ្គបណ្ឌិតសភាចារ្យ គូសបញ្ជាក់ថាទោះបីត្រូវប្រឈមនឹងភាពមិនប្រាកដប្រជាកាន់តែស្រួចស្រាល់ ក្នុងបរិការណ៍សកល ក៏ដូចជាត្រូវប្រឈមនឹងការរំលោភ លើអធិបតេយ្យជាតិ និង បូរណភាពទឹកដី យ៉ាងណាក្ដី​ ក៏សេដ្ឋកិច្ចកម្ពុជា ត្រូវបានរំពឹងថា អាចនឹងសម្រេចបានកំណើន ក្នុងរង្វង់ប្រមាណ ៥,២%ក្នុងឆ្នាំ២០២៥ និង ប្រមាណ៥% សម្រាប់ឆ្នាំ២០២៦ នេះ ។ ទន្ទឹមនេះ​កិច្ចខិតខំឥតរាថយ និងឆន្ទៈមោះមុតរបស់រាជរដ្ឋាភិបាល​ សំដៅកែលម្អបរិយាកាសសម្រាប់ធុរកិច្ច និង ការវិនិយោគ​ បានជំរុញឲ្យការវិនិយោគផ្ទាល់ពីក្រៅប្រទេសបន្តកើនខ្ពស់ គួរជាទីមោទនៈ។ ជាក់ស្ដែង​ ផ្អែកតាមទិន្នន័យរបស់ក្រុមប្រឹក្សា អភិវឌ្ឍន៍កម្ពុជា​ ការចុះបញ្ជីគម្រោងវិនិយោគពីបរទេស ក្នុងឆ្នាំ២០២៥ កន្លងទៅ មានទំហំទុនសរុបប្រមាណ១០ ប៊ីលានដុល្លារអាម៉េរិក​ មានកំណើន ៤៥% បើធៀបនឹងឆ្នាំ ២០២៤ ។ ជាមួយគ្នា​នេះ ក្នុងវិស័យពាណិជ្ជកម្មក្រៅប្រទេស​ ការនាំចេញរបស់កម្ពុជា ក្នុងឆ្នាំ២០២៥ក៏បន្តរក្សាបាននូវចលនការកំណើនល្អគួរឲ្យកត់សម្គាល់។ តួយ៉ាងការនាំចេញសរុបក្នុងឆ្នាំ ២០២៥ បានកើនប្រមាណជាង ១៧%, បើធៀបនឹងឆ្នាំ ២០២៤ ។ ចំពោះរំហូរភ្ញៀវទេសចរណ៍, ការធ្វើដំណើរ និង កញ្ចប់ទេសចរណ៍ទីផ្សារឆ្ងាយ របស់ទេសចរបរទេសមកកាន់កម្ពុជា ក៏នៅដំណើរការជាធម្មតា និងមាននិន្នាការកើនផងដែរ តួយ៉ាងដូចជាទេសចរ ពីអឺរ៉ុប, អូស្ត្រាលី និង ឥណ្ឌា ។ អគ្គបណ្ឌិតសភាចារ្យ​ បានគូសបញ្ជាក់បន្ថែមថា «ការសម្រេចបាននូវលទ្ធផលដ៏ល្អខាងលើ បានបង្ហាញច្បាស់ថា យុទ្ធសាស្ត្របញ្ចកោណ-ដំណាក់កាលទី ១ នៅតែត្រឹមត្រូវ, ចាំបាច់ និង សមស្រប, ប៉ុន្តែគប្បីត្រូវបានសម្រួចបន្ថែមនិង អនុវត្ត ប្រកបដោយភាពបត់បែន ទៅតាមនិន្នាការ និង បរិការណ៍នៃការប្រែប្រួលថ្មី»។ អគ្គបណ្ឌិតសភាចារ្យ អូន ព័ន្ធមុនីរ័ត្ន បន្តថា ជាទិសដៅទៅមុខ​ រាជរដ្ឋាភិបាល បានកំណត់គោលដៅ «រក្សាឲ្យបាននូវចលនការកំណើន និង ឈានទៅសម្រេចអត្រាកំណើនខ្ពស់ ក្នុងករណីស្ថានភាពសេដ្ឋកិច្ច សកលមានភាពប្រសើរឡើងវិញ» ដោយប្រកាន់យកអភិក្រម ចំនួន២ ទន្ទឹមគ្នា, ពោលគឺ៖ ទី១. ពុះពារដោះស្រាយបញ្ហាប្រឈមចំពោះមុខ, និង ទី២. គិតគូររៀបចំ និង ដាក់ចេញ នូវវិធានការគោលនយោបាយគាំទ្រកំណើន, ជាពិសេស សម្រាប់វិស័យជាចន្ទល់នៃកំណើន ដែលមិនទាន់ងើបឡើងវិញបានពេញលេញនៅឡើយ រួមមាន៖វិស័យទេសចរណ៍ និង វិស័យសំណង់ និង អចលនទ្រព្យ ជាដើម​៕

ព័ត៌មានទាក់ទង